Со оглед дека заклучно со 31.05.2022 година заврши периодот во кој на сила беше Одлуката на владата за намалена акциза и данок на додадена вредност за нафтени деривати (Одлука за определување на видот на енергентите, временскиот период, како и начинот на пресметка на акцизата и Одлуката за определување на видот на добрата и временскиот период на примена на повластена даночна стапка), Регулаторната комисија за енергетика и водни услуги на Република Македонија донесе Одлука со која изврши усогласување со законските прописи кои веќе се во сила од денес 01.06.2022 година, а со која малопродажните цени на нафтените деривати се зголемуваат во просек за 7,96%.
Малопродажната цена на бензинот ЕУРОСУПЕР БС-95 се зголемува за 9,00 ден/лит, додека на безоловниот бензин ЕУРОСУПЕР БС-98 се зголемува за 9,50 ден/лит, во однос на малопродажните цени утврдени со одлуката за утврдување на највисоки малопродажни цени на нафтените деривати и горива за транспорт од 30.05.2022 година, и со тоа малопродажната цена на ЕУРОСУПЕР БС-95 изнесува 104,00 ден/лит, додека малопродажната цена на ЕУРОСУПЕР БС-98 изнесува 106,50 ден/лит.
Малопродажната цена на ЕУРОДИЗЕЛ (Д-Е V), се зголемува за 9,00 ден/лит, во однос на малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 30.05.2022 година и со тоа малопродажната цена на ЕУРОДИЗЕЛ (Д-Е V), изнесува 95,00 ден/лит.
Малопродажната цена на Екстра лесното масло за домаќинство (ЕЛ-1), се зголемува за 8,50 ден/лит, во однос на малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 30.05.2022 година и со тоа малопродажната цена Екстра лесното масло за домаќинство (ЕЛ-1) изнесува 93,00 ден/лит.
Малопродажната цена на Мазутот М-1 НС во денешната одлука е иста со малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 30.05.2022 година, односно цената на Мазутот М-1 НС изнесува 54,640 ден/кг.
Референтните цени на нафтените деривати на светскиот пазар, како и курсот на денарот во однос на доларот, во пресметката од 31.05.2022 се исти со претходната пресметка од 30.05.2022, односно во пресметка е извршена промена само на акцизите и данокот на додадена вредност, дефинирани со прописите за акцизи и данокот на додадена вредност.
Од РКЕ напоменуваат дека ова се максималните цени на нафтените деривати со важност од 00:01 часот, 1.6.2022 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.