На денешен ден пред 19 години во несреќа на владиниот авион што се случи кај Ротимље во Босна и Херцеговина загина претседателот на Македонија Борис Трајковски. Во авионот со кој патуваше на регионална конференција во Мостар, а кој се урна пред слетување, патуваа и портпаролката на претседателот Димка Илкова Бошковиќ, советниците Ристо Блажевски и Анита Лозановска, претставникот на МНР Миле Крстевски, телохранителите Аце Божиновски и Борис Велиновски, како и пилотите Марко Марковски и Бранко Ивановски. Сите загинаа.
Долго време траеше истрагата за причините за уривањето на авионот, целата истрага ја следеа бројни нејаснотии, во јавноста се ширеа различни верзии, а беа вклучени експерти од Македонија и Босна и Херцеговина. Имаше и повторена, втора истрага, која ќе утврди дека се работело за авионска несреќа и грешка при спуштањето на владиното летало, а на што можеби влијание имале и временските услови.
Борис Трајковски е роден во Струмица во 1956 година. Дипломирал на Правниот факултет во Скопје, на Универзитетот „Св. Кирил и Методиј” во 1980 година. Специјализирал деловно право и право на работни односи.
За претседател на Република Македонија беше инаугуриран на 15 декември 1999 година, наследувајќи го Киро Глигоров. Како претседател беше посветен на демократски идеали и на евроатланската ориентација на Република Македонија, а значаен е неговиот придонес во надминување на воената криза од 2001 година.
„Ние мора да создадеме општество засновано од индивидуалци, не од колективни групи и граѓани, не од етнички групи. Моја визија е да создадеме општество засновано на демократија, владеење на правото и слободна пазарна економија и конечно да создадеме општество засновано на доверба. Ние го правиме тоа, но не е доволно само да се зборува за демократија, а истовремено да се дозволува цутање на криминалот и корупцијата”, говореше Борис Трајковски.
Денеска, шефот на државата Стево Пендаровски, министри и други државни функционери ќе присуствуваат на одбележувањето на 19-годишнината од трагичната смрт на претседателот Борис Трајковски во Скопје, Струмица и во Ротимље, Босна и Херцеговина